Առնո Բաբաջանյան

Փետրվարի 8-ին դպրոցի դահլիճում կայացավ համերգ-միջոցառում՝ նվիրված հայ մեծ կոմպոզիտոր Առնո Բաբաջանյանին: Միջոցառումը կազմակերպել էր երաժշտության ուսուցչուհի Նարինե Շահինյանը, իսկ մասնակիցները դպրոցի հինգից յոթերորդ դասարանների շնորհալի աշակերտներն էին:  Երգչախմբի կատարմամբ հնչեցին կոմպոզիտորի հայտնի և սիրված երգերը, որոնք մեծ ջերմությամբ ընդունվեցին հանդիսատեսի կողմից: Առանձնապես լավ ընդունվեցին մենակատարներ Գոռ Հարությունյանի և Վարդուհի Միրզոյանի կատարումները: Երգերի ընթացքում եղան նաև պարային կատարումներ: Ներկայացվեց  մեծ երաժշտի կյանքը, մտքերը, երաժշտության իր ընկալումը:  

Այցելություն զորամաս

 Փետրվարի մեկին դպրոցի իններորդ դասարանցիները դպրոցի փոխտնօրենի, զինղեկի և դասղեկների ուղեկցությամբ այցելեցին Իջևանում տեղակայված զինվորական զորամաս: Երեխաների այցի նպատակն էր  ծանոթանալ զորամասին, զինվորի առօրյային, ինչպես նաև փոքրիկ  նվերներ հանձնել հայրենիքի պաշտպաններին: Աշակերտներին դիմավորեց գնդի հրամանատարի տեղակալը, ով մանրամասնորեն ներկայացրեց զինվորների ծառայությունը, առօրյան և առաջարկեց էքսկուրս  կատարել զորամասի տարածքում:  Բոլորը տպավորված էին զորամասի մաքրությունից, կարգուկանոնից, կահավորված կաբինետներից: 

Աշակերտներին հնարավորություն տրվեց նաև իրենց մի քիչ զինվոր զգալ. նրանք ինքնուրույն քանդեցին և հավաքեցին  ինքնաձիգը: 

 Երեխաները եղան նաև ճաշարանում, որտեղ պատրաստվում էր զինվորների ընթրիքը, մարզահրապարոկում , որտեղ փորձեցին իրենց ուժերը:

Առանձնապես ոգևորված էին տղաները: Մեկը մյուսին ասում էր. ՙՙԵս մեծ հաճույքով կծառայեմ այսպիսի զորամասում՚՚: 

Էքսկուրսիայի վերջում ձեռք բերվեց պայմանավորվածություն մայիսին ևս մեկ անգամ հանդիպել, այս անգամ արդեն համերգային ծրագրով:

Սպորտլանդիա

Հունվարի 31-ին դպրոցի մարզադահլիճում տեղի ունեցավ սպորտլանդիա VIIա  և VIIբ դասարանների թիմերի միջև: Թիմերը պատրաստ էին համառ ու անզիջում պայքարի:  Փորձառու ուսուցիչների կողմից ընտրված էին հետաքրքիր շարժախաղեր, որոնք պահանջում էին ճարպկություն,  արագաշարժություն, դիպուկություն, ուշադրության կենտրոնացում:  Աշակերտները շատ լավ կատարեցին տրված առաջադրանքները: Նրանց ողջ

խաղի ընթացքում ոգևորում էին բազմաթիվ երկրպագուները: 

Դե, իսկ խաղի արդյունքը շատ ճիշտ արտացոլեց ընթացքը՝ ոչ-ոքի:

  Գոհ էին բոլորը: Մրցակիցները, ջերմորեն ողջագուրվելով, հրաժեշտ տվեցին իրար՝ խոստանալով կրկին հանդիպել:

;

Բերքի տոն

Հոկտեմբերի 20-ին դպրոցում անցկացվեց ավանդական Բերքի տոնը: Այս միջոցառմանն անհամբեր սպասում են բոլորը՝ աշակերտները, ծնողները, ուսուցիչները:
Ամեն տարի տոնին որոշակի  ուղղություն է տրվում: Այս տարի այն նվիրված էր հացին: Յուրաքանչյուր դասարան իրեն հատկացված սեղանը ձևավորել էր հացի և ցորենի հետ կապված  խորհրդանիշներով:  Վեցերորդ ա դասարանի աղջիկները տեղում հաց էին թխում և հյուրասիրում բոլորին:
Միջոցառումն ուղեկցվում էր հացին նվիրված խոսքերով ու բանաստեղծություններով,   երգ ու պարով: 

Լեզուների միջազգային օր

Սեպտեմբերի 19-ին նշվում է լեզուների միջազգային օրը; Այդ օրը դպրոցի օտար լեզվի մասնախումբը կազմակերպել էր փոքրիկ միջոցառում: Տարբեր դասարանների աշակերտները խոսեցին լեզոևների ծագման, նշանակության մասին, կատարվեցին երգեր հայերեն, ռուսորեն, անգլերեն, ֆրանսերեն լեզուներով: