Շաբաթօրյակ

Չնայած անձրևային եղանակին` դպրոցի աշակերտները և ուսուցիչները ակտիվ մասնակցություն ունեցան  ապրիլի 14-ին կազմակերպված հանապետական շաբաթօրյակին:  Երեխաները մաքրեցին դասասենյակները, փխրեցրին դպրոցամերձ հողամասի մի հատվածը, իսկ երկրորդ դասարանցիները կազմակերպեցին ծառատունկ, քաղհանեցին իրենց հատկացված  տարածքը:

Ֆրանկոֆոնիայի ամիս

Մարտի 20-ը ֆրանկոֆոնիայի միջազգային օրն է: Այդ կապակցությամբ մարտի 20-ից ապրիլի 20-ը դպրոցում հայտարարվել է ֆրանկոֆոնիայի ամիս: Դրա շրջանակներում կազմակերպվում են փոքրիկ միջոցառումներ, զեկուցումներ, ունկնդրումներ,

 պատրաստվել են վահանակներր և ստենդներ, բեմադրվել է  թատերական ներկայացում: 

Հաճելի անակնկալ

Ութերորդ բ դասարանի աշակերտները, ծնողական խորհրդի հետ միասին,  ապրիլի 7-ի կապակցությամբ հաճելի անակնկալ մատուցեցին ուսուցիչներին և մայրիկներին:  Երեխաները գեղեցիկ ձևավորել էին դասասենյակը,  պատրաստել մորը նվիրված երգեր և բանաստեղծություններ, բեմադրել պարեր: Միջոցառման վերջում ներկաներից յուրաքանչյուրին   աշակերտները մեկական վարդ   նվիրեցին: 

  Այս փոքրիկ միջոցառումը կարևորվում է նրանով, որ ամեն ինչ արվել էր ինքնաբուխ, աշակերտների ցանկությամբ  և ի սրտե, ինչի համար  ուրախ էին բոլոր պարապող ուսուցիչները: 

Սպորտլանդիա

Հայաստանի հանրապետության և Արցախի հանրակրթական դպրոցների աշակերտների շրջանում անցկացվող "Սպորտլանդիա" մարզական խաղը մեծ հաջողություններ է գրանցում դպրոցի մարզական կյանքում:  Մեր դպրոցի  I-III  և IV-VII դասարանները ներկայացնող 2 թիմերը, հաղթելով տարածքային փուլում, դուրս են եկել մարզային փուլ:

  Ապրիլի 9-ին տեղի ունեցավ I-III դասարանների մարզային փուլը: Մասնակցում էին յուրաքանչյուր տարածաշրջանից հաղթող ճանաչված երկուական թիմ` Բերդի հ. 3  և  հ.4 հիմնական, Դիլիջանի հ.2  և հ. 4 հիմնական, Իջևանի հ.1 և հ. 3 հիմնական, Բերդավանի և Բագրատաշենի միջնակարգ դպրոցների թիմերը: Համառ ու երկարատև պայքարում հաղթանակը տարավ մեր դպրոցի թիմը` արժանիորեն գրավելով առաջին տեղը: Երկրորդ տեղը գրավեց Դիլիջանի հ.2 հիմնական դպրոցի թիմը, երրորդ մրցանակը շնորհվեց Իջևանի հ.3 հիմնական և Դիլիջանի Հ.4 հիմնական դպրոցների թիմերին:

   Նշենք, որ առաջին և երկրորդ տեղը գրաված թիմերը կմասնակցեն Գյումրիում կայանալիք հանրապետական փուլին և կվիճարկեն հաղթողի կոչումը:

Ապրիլի 7-ին...

Ապրիլի 7-ին` Մայրության և գեղեցկության
 տոնի կապակցությամբ աշակերտական խորհուրդը  դպրոցի առաջին հարկի միջանցքում կազմակերպել էր փոքրիկ միջոցառում: Դպրոցի շնորհալի աշակերտները  իրենց երգ ու պարով շնորհավորեցին ուսուցչուհիների և դասընկերուհիների տոնը և գարնանային տրամադրությւն պարգևեցին նրանց:

Սուրբ Զատիկ

Սուրբ Զատիկն այն տոներից է, որը միշտ նշվում է մեր դպրոցում` ՀԵՊ ուսուցչուհի Ս. Յարալյանի ջանքերով: Այս տարին ևս բացառություն չէր, և տոնը նշվեց վեցերորդ բ դասարանի աշակերտների ուժերով:  Երեխաները ներկայացրին Զատկի խորհուրդը, բեմակացրին փոքրիկ ներկայացումներ, որով ցույց տվեցին Հիսուս Քրիստոսի հրաշափառ հարության, բարության  դերը մարդու կյանքում: Նրանք նաև աշխույժ երգ ու պարով առավել տոնական դարձրին միջոցառումն ու օրը: 

Ինտելեկտուալ խաղ

Մարտի 21-ին  տեղի ունեցավ ինտելեկտուալ խաղ-մրցույթ յոթերորդ դասարանցիների միջև: Յոթերորդ ա և յոթերորդ բ դասարանների թիմերը լրջորեն էին նախապատրաստվել խաղին: Հարցաշարը կազմված էր պատմություն առարկայից: Միջոցառման սրահը ևս ձևավորված էր առարկային  համապատասխան` եռագույն թիկնոցներ, հայոց արքայատոհմերի զինանշաններ, քարտեզներ և այլն:  Հանդիսատեսները ևս բուռն ծափահարություններով քաջալերում էին իրենց սիրելի թիմին: Համառ պայքարում հաջողությունն ուղեկցեց VII ա դասարանին:
 Թիմի անդամները պարգևատրվեցին արժեքավոր գրքերով, իսկ VII բ դասարանի թիմի անդամները պարգևատրվեցին  խրախուսական մրցանակներով:

Սեր և գեղեցկություն

Սիրո և գեղեցկության տոնին էր նվիրված մարտի 7-ին դպրոցի աշակերտական խորհրդի և կազմակերպիչ Ս. Պետրոսյանի կազմակերպած միջոցառումը: Այն իր ձևով նորություն էր և անցավ մեծ հաջողությամբ: Միջոցառումը կազմված էր երեք մասից; Առաջին մասում աշակերտները ներկայացրին հետաքրքիր զրույցներ սիրո մասին , որոնք գեղեցիկ ձևավորված բեմում առավել խորհրդավոր էին թվում: Երկրորդ մասում հնչեցին սիրո մասին բանաստեղծություններ, դե, իսկ երրորդ մասը երաժշտական էր: Այս մասում հնչեցին հայկական ժողովրդական զուգերգեր և խմբերգեր, որոնք հանդիսատեսների կողմից ընդունվեցին ջերմությամբ և   տարան դեպի հայ երգարվեստի ակունքները: 

Միջոցառումը շատ գունեղ էր, գեղեցիկ ձևավորումներով և հագուստներով, որոնք առավել գրավիչ դարձրին այն:

Հովհաննես Թումանյան

Մարտի 2-ին IV բ դասարանի աշակերտները դասվար Մ. Մկրտումյանի ղեկավարությամբ մի գեղեցիկ միջոցառում ներկայացրին հանդիսատեսի դատին: Այն նվիրված էր ամենայն հայոց բանաստեղծ Հովհաննես Թումանյանին: Փոքրիկները երկար  էին նախապատրաստվել  միջոցառմանը,  մոտեցել ամենայն պատասխանատվությամբ ու մեծավարի:  Նրանք ներկայացրին մեծ բանաստեղծի հայտնի ստեղծագործությունները, բեմականացրին հեքիաթներից որոշ

հատվածներ, երգեցին, պարեցին: Բոլորին շատ  դուր եկավ այս գողտրիկ միջոցառումը:

Քաղպաշտպանության օրը դպրոցում

    Մարտի 1-ին  ողջ աշխարհում նշվում է որպես ՔՊ միջազգային օր: Մեր դպրոցը ես, ինչպես յուրաքանչյուր տարի, անմասն չէր  կազմակերպվող միջոցառումներից: 

 

 Օրն սկսվեց հանդիսավոր տողանով: Դպրոցի զինղեկ Ռ. Քամալյանը զեկուցեց տնօրեն Ա. Փաշինյանին դպրոցի պատրաստականության մասին: Առաջին դասաժամի ընթացքում բոլոր դասարաններում կատարվեցին անհատական պաշտպանական միջոցի՝ հակագազի  համարի չափման

աշխատանքներ: 

Երկրորդ ժամին բոլոր երրորդ դասարանցիները դահլիճում դիտեցին ՛՛Բնական աղետներ՛՛ տեսաֆիլմը, պատասխանեցին դրան վերաբերող հարցերին: Երեխաները նաև բերել էին իրենց նկարչական աշխատանքները, որտեղ պատկերել էին տարբեր աղետներ:

 

 Երկար դասամիջոցին հինգերորդ, վեցերորդ դասարանցիների համար դպրոցի միջանցքում դասղեկները անցկացրին մրցույթ-վիկտորինա:  Յոթերորդ դասարանցիները համակարգչային կաբինետում դիտեցին ՛՛Առաջին բուժօգնությունը աղետների դեպքում՛՛ տեսաֆիլմը:

   Ութերորդ և իններորդ դասարանցիների համար դահլիճում անցկացվեց հայրենասիրական թեմայով զրույց-զեկուցում՝ ՛՛Ապրիլյան քառօրյա պատերազմ՛՛ թեմայով:

   Օրվա վերջում տրվեց պայմանական ՛՛Օդային տագնապ՛՛ :  Դպրոցի ողջ անձնակազմը  4ր. 10վրկ. ում տարհանվեց անվտանգ տարածք:  

Ողջ օրվա ընթացքում դպրոցում էին  ԱԻՆ 911 ծառայության աշխատակիցները, ովքեր իններորդ
դասարանցիների հետ անցկացրին բաց դաս, պատասխանեցին երեխաների հարցերին:

Դպրոցական կյանք

Հայաստանում երիտասարդ ֆրանկոֆոնների (ֆրանսիախոսների) թատերական փառատոնի շրջանակներում մեր դպրոցի աշակերտները, ֆրանսերենի ուսուցչուհի Ս. Հովհաննիսյանի ղեկավարությամբ, բեմադրել են ՛՛Barbus au sommet d'une montange'' (Մորուքավորները սարի գագաթին) պիեսը,       որի      հեղինակն է
                                                                                               ժամանակակից գրող Մարտին Բելմարը: Բեմադրությունը նկարահանվել  է, և տեսագրությունը ուղարկվել է ՛՛10-ից 10 փառատոնի՛՛  (Festival 10 sur 10) կազմակերպիչներին: Ժյուրիի հավանությանն արժանանալու դեպքում մեր թատերական խումբը մարտի 30-31-ը կմեկնի Գյումրի, որտեղ տեղի կունենա փառատոնի եզրափակիչ փուլը:
 
Այս փառատոնի նպատակն է ֆրանսերեն սովորող երեխաներին ոգևորել և ընդգրկել ֆրանսերենի  ուսուցման մեջ թատրոնի միջոցով:

Նկարահանումից հետո

Մեր աշակերտները մեծ ոգևորությամբ են մասնակցել բեմականացմանը և անհամբեր սպասում են
արդյունքներին: 

Բանավեճի ակումբ

Ջինիշյան հիմնադրամի հովանավորությամբ իրականացվող Բանավեճի ակումբի շրջանակներում փետրվարի 27-ին տեղի ունեցավ հերթական խաղը Իջևանի հ. 1 հիմնական և Սևքարի միջնակարգ դպրոցների թիմերի միջև: Խաղի թեման էր 

՛՛ Հայաստանի Հանրապետությունում ատոմակայանի գոյությունը արդարացված է՛՛: Ըստ խաղի կանոնների նախապես տեղի ունեցավ վիճակահանությունը, որի արդյունքում մեր թիմին բաժին ընկավ ՛՛Դեմ՛՛ դիրքորոշումը պաշտպանելը: Դա  մի փոքր դժվարացրեց թիմի գործը, քանի որ դեմ դիրքորոշման թիմի անդամները պետք է տեղում հակապնդումներ հնչեցնեն կողմ դիրքորոշման պնդումներին:  Մեր թիմը պատվով դուրս եկավ դժվար վիճակից, սակայն վերջում, միավորների հաշվարկով, ցավալի պարտություն կրեց 43-36 հաշվով: 

  Հաջորդ խաղը նախատեսված է անցկացնել մարտի 20-ին,  որից հետո երկու խաղերի արդյունքում կընտրվի մարզային թիմ, որը կմասնակցի մայիսին Երևանում անցկացվող եզրափակչին:

  Նշենք, որ մեր թիմը ներկայացնում էին իններորդ դասարանի աշակերտուհիներ  Լիան, Մարիամը, Մարուսյան, Մարինան և Անահիտը:

Բարեկենդան

Փետրվարի 23-ին դպրոցում տեղի ունեցավ միջոցառում՝ նվիրված Բարեկենդանի տոնին: Այն նախաձեռնել և կազմակերպել էին ՀԵՊ ուսուցչուհի Ս. Յարալյանը  և յոթերորդ բ դասարանի  աշակերտները  (դասղեկ՝ Լ. Գալստյան): 

   Երեխաները նախ բեմադրեցին հանրահայտ  ՛՛Բարեկենդանը՛՛ հեքիաթը, որից հետո բացատրեցին, թե ինչու տանտիրուհին ընկավ այդպիսի պատմության մեջ.  նա չգիտեր, թե ինչ է Բարեկենդանը: 

   Աշակերտները ներկայացրին Բարեկենդանի իմաստը, նշեցին, թե երբ է այն լինում, ինչպես են տոնում, ինչ է նշանակում բարեկենդան բառը: Բեմականացվեցին նաև Բարեկենդանի  որոշ խաղեր:

   Միջոցառումը  ուսուցողական էր և հետաքրքիր,  հանդիսատեսները շատ բան սովորեցին հայկական ավանդական այս տոնի մասին:

Մրցույթ մաթեմատիկայից

Փետրվարի 21-ին մաթեմատիկայի մասնախմբի ուսուցիչների նախաձեռնությամբ կայացավ ինտելեկտուալ խաղ-մրցույթ   վեցերորդ դասարանցիներ մասնակցությամբ:  Վեցերորդ ա և բ դասարանների թիմերը կազմված էին հինգ  անդամներից: Մրցույթի առաջադրանքները կազմված էին այս տարվա անցած դասանյութից:  Տրվեց 20  հարց, յուրաքանչյուր հարցին թիմերը պատասխանում էին գրավոր և ներկայացնում ժյուրիին: Այնուհետև էկրանին երևում էր ճիշտ պատասխանը: Պետք է նշել, որ երկու թիմն էլ լավ  էին հիշում  անցած նյութը և տալիս էին ճիշտ պատասխաններ: 

   Խաղը ընդմիջվում էր  նաև երաժշտական կատարումներով, որոնք թուլացնում էին լարվածությունը:

Խաղի արդյունքում չնչին ՝ մեկ միավորի առավելությամբ հաղթեց վեցերորդ ա դասարանի թիմը: Ամփոփման ժամանակ ժյուրին շեշտեց, որ ընդհանուր առմամբ խաղը հավասար էր, և եթե չլիներ փոքրիկ հաշվարկային սխալը, խաղը կավարտվեր ոչ-ոքի:  Այդ էր պատճառը, որ երկու թիմերի անդամներին էլ հանձնվեցին  միևնույն նվերները: