Աշակերտական ընդհանուր ժողով

Հոկտեմբերի 7-ին տեղի ունեցավ դպրոցի աշակերտական ընդհանուր ժողով: Օրակարգում նախորդ տարվա աշխատանքների ամփոփումն էր և աշակերտական խորհրդի նախագահի թեկնածուների նախընտրական ծրագրերի ներկայացում: Քանի  որ աշխորհրդի նախագահը ավարտել է դպրոցը, նախորդ տարվա աշխատանքները ներկայացրեց կազմակերպիչ Ս. Պետրոսյանը:  Ժողովը աշխատանքը գնահատեց բավարար: 

Այնուհետև ներկայացվեցին աշխորհրդի կողմից առաջադրված թեկնածուները: Նրանք չորսն էին՝ Կամո Աղբալյան, Զարուհի Բեջանյան, Գագիկ Հայրապետյան, Նարե Տիգրանյան: Սակայն Զ. Բեջանյանը ինքնաբացարկ էր հայտնել: Մյուս երեք թեկնածուները ներկայացրին իրենց նախընտրական ծրագրերը:  Որոշվեց անցկացնել նախընտրական քարոզարշավ: 

Ժողովի ավարտին տնօրեն Ա. Փաշինյանը պատվոգրեր հանձնեց ՀՀ անկախության 25-ամյակին նվիրված թեթև ատլետիկայի մրցաշարի հաղթողներին:

Դպրոցի աշակերտները և ուսուցիչները մեծ ոգևորությամբ ձեռնամուխ եղան թղթի թափոնի հավաքման գործին: Մեկ շաբաթում հավաքվեց ավելի քան մեկ տոննա թափոն, որը հանձնվեց հավաքող կազմակերպությանը : Թափոնի փոխարեն դպրոցը կստանա տարբեր ֆորմատների որակյալ թուղթ:

Անկախություն 25

Այս տարի լրացավ Հայաստանի անկախության 25-րդ տարեդարձը: Սեպտեմբերի 21-ի առավոտյան դպրոցի աշակերտական և ուսուցչական ողջ կոլեկտիվը հավաքվել էր դպրոցի բակում՝ մասնակցելու տոնական միջոցառմանը: Աշակերտների ձեռքին եռագույն դրոշներ ու փուչիկներ են, բոլորը համակված են տոնական  ու հաղթական տրամադրությամբ:

Զեկուցմամբ հանդես եկավ դպրոցի զինղեկ Ռ. Քամալյանը: Նա հանգամանորեն ներկայացրեց ՀՀ անկախության 25 տարիների ընթացքում ունեցած ձեռքբերումները, առանձնապես կարևորեց բանակաշինությունը՝ որպես մեր պետության անվտանգության երաշխավորի:

Ելույթ ունեցան դպրոցի շնորհալի աշակերտները, պարի խմբակի սաները: Նրանց կատարումները մեծ ոգևորություն առաջացրին:

 Միջոցառումից հետո դպրոցի ողջ անձնակազմը մասնակցեց անկախության երթին և ծաղիկներ խոնարհեց անկախության համար զոհված մարտիկների հուշարձանին:

ԱՊՀ 25

Սեպտեմբերի 15-ին IXա դասարանում տեղի ունեցավ բաց դաս՝ նվիրված ԱՊՀ 25-ամյակին: Դրանով մեր դպրոցը ևս միացավ միասնական բաց դասին, որը միևնույն օրը տեղի ունեցավ հանրապետության բոլոր դպրոցներում:

Դասի սկզբում բացման խոսքով հանդես եկավ պատմության ուսուցչուհի Ս, Բեկնազարյանը, որից հետո աշակերտները ներկայացրին ԱՊՀ ստեղծման նախապատմությունը, պայմանները, զարգացումը: Անդրադարձ կատարվեց նաև Ղարաբաղյան հիմնախնդրին: 

Նշենք, որ դասը հագեցած էր տեխնիկական միջոցներով: Դասին ներկա էին ուսուցիչներ, ովքեր գոհ և տպավորված հեռացան դասից:

Սեպտեմբերի 1

Սեպտեմբերի 1-ը դպրոցականների սիրած տոներից է: Երկար անջատումից հետո նրանք վերադառնում են հարազատ կրթօջախ, ուր նրանց են սպասում ուսուցիչները: Սեպտեմբերյան այդ պայծառ օրը անմոռաց կմնա հիսունհինգ առաջին դասարանցիների համար. նրանք գեղեցիկ ծաղկեփնջերով ու լարված սպասումով էին եկել դպրոց: 

Ողջույնի խոսքով հանդես եկավ դպրոցի տնօրեն Ա. Փաշինյանը, ելույթ ունեցան իններորդ դասարանի աշակերտուհի Զարուհի Բեջանյանը, մի խումբ շնորհալի աշակերտներ: Այնուհետև գիտության բանալին  իններորդ դասարանցիները հանձնեցին առաջին դասարանցի փոքրիկին: Հնչեց առաջին զանգը և բոլորին կանչեց դպրոց: 

Հրաժեշտ դպրոցին

Ուսումնական տարին, որպես կանոն եզրափակվում է հրաժեշտի միջոցառումներով: Այս տարի մեր դպրոցին հրաժեշտ տվեցին 61 շրջանավարտ: Գեղեցիկ և տոնական զարդարված

բեմահարթակին, որը մեծ նավ է հիշեցնում,   հուզված իններորդցիներն են, ովքեր խիզախ նավաստիների նման  9 տարի նավարկելով՝ հասել են ափ և պետք է խարիսխ նետեն: Բայց մինչ այդ նրանք ներկայացնում են աշխարհի յոթ անհայտ հրաշալիքները, այն արժեքները, որոնք ուսումնառության 9 տարիների ընթացքում իրենք սովորել են գնահատել ու պահպանել: Դրանք են մարդը, մայրը, մանուկը, սերը, կյանքը, սիրտը և հայրենիքը:

...Նավաստիները շփոթված են, չգիտեն, թե որ ուսումնական հաստատությունն են ընտրելու՝  ուսումը շարունակելու համար:  Նավապետը, պատմաբանը և աշխարհագրագետը ներկայացնում են քաղաքի դպրոցների պատմությունը և բարի ճանապարհ մաղթում իններորդցիներին: Եվ ահա նրանք բարձրանում են տախտակամած՝ հրաժեշտ տալու իրենց անբաժան ուղեկիցներին, ՛՛ում ուսուցիչ անունն են տվել՛՛:  

Հրաժեշտի հուզիչ խոսքեր, արցունքներ, ժպիտներ...  Ամեն ինչ խառնվել էր իրար... 

Հավերժի ճամփորդը

Մայիսյան եռատոնին ընդառաջ հետաքրքիր միջոցառում էր կազմակերպվել IV Ա դասարանում (դասվար Օվսաննա Հարությունյան):  Գևորգ Էմինի հայտնի ստեղծագործության՝                  ,, Հավերժի ճամփորդի,,  հիման վրա  ստեղծվել էր մի գեղեցիկ գրական-երաժշտական  սյուժե.  վարագույրի հետևից լսվում էր հեղինակի թավ ձայնը, ով պատմում է հայ ժողովրդի պատմության, հերոսների, անցած ճանապարհի մասին: Իսկ հանդիսատեսի աչքի առջև հառնում էին այն կերպարները, ովքեր կերտել են հայ ժողովրդի պատմությունը՝ Հայկ Նահապետը, Տիգրան Մեծը,Մեսրոպ Մաշտոցը,   Սասունցի Դավիթը

Միջոցառուման ընթացքում  վեցերորդ դասարացիների կատարմամբ հնչեցին երգեր, որոնք ոգևորությամբ ընդունվեցին դահլիճի կողմից, իսկ չորրորդ դասարանցի Արմանի կատարումն ուղղակի հիացրեց և բուռն ոգևորություն առաջացրեց:

Բեմի նկարչական ձևավորումը կատարել էր  Լուսինե Փարսադանյանը:

Հրաժեշտ Այբբենարանին

Մայիս ամսին  դպրոցական առօրյայի ամենահագեցած օրերից են  այբբենարանի հրաժեշտի միջոցառումների օրերը: 2015-16 ուստարում հրաժեշտի միջոցառումները կազմակերպվել էին երեք առաջին դասարաններում: Փոքրիկների ուսուցիչները՝ Ա. Ալոյանը, Կ. Կլեկչյանը, Ս. Զաքարյանը, ուսուցչի օգնականները, երաժշտության ուսուցչուհի Ն. Շահինյանը, պարուսույց Դ.Գասպարյանը, գեղարվեստական ձևավորող Լ. Փարսադանյանը  ջանք ու եռանդ չէին խնայել  տոնը հիասքանչ և անմոռանալի դարձնելու համար:

Հաշվետու համերգ

2015-16 ուսումնական տարվա ավարտին երաժշտության ուսուցչուհի Ն. Շահինյանի նախաձեռնությամբ կայացավ հաշվետու համերգ՝ դպրոցի 5-7-րդ դասարանների աշակերտների մասնակցությամբ:  Աշակերտները ըստ դասարանների  կազմած երգչախմբերով  հանդես եկան տարվա ընթացքում իրենց սովորած ծրագրային երգերի կատարումով:  Երեխաներն իրենց հրաշալի կատարումներով հիացրին հանդիսատեսներին: Որոշ երգեր ուղեկցվում էին պարային կատարումներով:  

 

Ավետման տոն

Տոնական տրամադրություն էր թևածում դպրոցի դահլիճում: Բեմահարթակը զարդարված էր գարնանային ծաղիկներով ու գույնզգույն փուչիկներով: Չնայած բոլորի դեմքին փայլում էր ուրախության, հրճվանքի ժպիտ, բայց հուզված էին բոլորը, ամենից շատ՝ հինգերորդ բ դասարանցիները:  Նրանք ցանկանում էին, որ այդ ցերեկույթը հաճույք պատճառի ոչ միայն աշակերտներին, այլև միջոցառման մասնակից ուսուցիչներին, հյուրերին:

 Հուզված էր նաև հեպ առարկայի ուսուցչուհի Ս. Յարալյանը: Նա ցանկանում էր, որ այդ օրը աշակերտները փայլեն իրենց ասմունքով, երգով, պարով, զգան ավետման տոնի՝ մարդկության փրկչի ՝ Գաբրիել հրեշտակապետի լուրը Սուրբ Մարիամ Աստվածածնին: Երբ գարունը բողբոջում է և մի անհայտ, անորոշ թրթիռով լցնում
 հոգիդ, հիշում ես Աստվածորդու մորն ուղղված ողջույնը.

- Ուրախացի՛ր, ով շնորհընկալ, Տերը քեզ հետ է: Մի՛ վախեցիր, Մարիա՛մ, որովհետև Աստծուց դու շնորհ գտար:

Հինգերորդցիները գլուխները բարձր պահած նայում են դահլիճի ուրախ, ժպտացող հայացքներին և համոզվում, որ բոլորը գոհ են իրենցից:

Ցերեկույթի վերջում դպրոցի տնօրեն Ա. Փաշինյանը, շնորհակալություն հայտնեց հինգերորդցիներին բոլորին ուրախ պահեր պարգևելու համար:

Շնորհակալություն, զինվո՛ր

Այս օրերին կրկին անգամ բռունցքվեց մեր ժողովուրդը՝ դիմակայելու ազերիների սանձազերզած ագրեսիայի նոր դրսևորմանը: Հայ զինվորը ստիպված էր մեկ անգամ ևս ապացուցել, որ թույլ չի տա թշնամուն  ոտք դնել հայ Արցախի հողին: Եվս մեկ անգամ հերոսացան մեր հայ արծիվ տղաները, ցավոք՝ շատերը կյանքի գնով: Ցավում ենք  և խոնարհվում նրանց հիշատակի առջև...

  

Մեր դպրոցի աշակերտները անմիջապես միացան Արցախի զինվորների համար կատարվող հանգանակությանը: Աշակերտները մի քանի ժամվա ընթացքում հավաքեցին քաղցրավենիք, հիգիենայի պարագաներ, դեղորայք,  գուլպաներ և այլն:  Մենք գիտենք, որ հայ զինվորը Արցախում ապահովված է անհրաժեշտ ամեն ինչով, սակայն սա շնորհակալության մի յուրահատուկ ձև է՝  սահմանին աներեր կանգնած մեր քաջերին:

Սուրբ Զատիկ

Մարտի 30-ին վեցերորդ ա դասարանի աշակերտները և Հայոց եկեղեցու պատմություն առարկայի ուսուցչուհի Ս. Յարալյանը պատրաստել էին մի գեղեցիկ միջոցառում՝ նվիրված Սուրբ Հարության տոնին: Միջոցառմանն իր պատվավոր մասնակցությունն էր բերել Տավուշի թեմի առաջնորդ  Տ. Բագրատ եպիսկոպոս Գալստանյանը: Նրան ուղեկցում էին տեր Սիմեոն, տեր Թորգոմ քահանաները:  Աշակերտները ներկայացրին Հիսուս Քրիստոսի կյանքը, մահը և հրաշափառ հարությունը: Փոքրիկ բեմականացման միջոցով Քրիստոսի աշակերտները և ինքը՝ Հիսուսը,  կարծես թե ներկա եղան միջոցառմանը: Հիսուսի դերը մարմնավորող Զավենը անչափ հուզված  էր, սակայն դա չխանգարեց, որ նա հանդիսատեսին հանձնի Ուսուցչի  պատգամները: Միջոցառմանը յուրահատուկ հմայք տվեց աղջիկների երգչախումբը՝ իր դյութիչ ու աստվածային ձայնով:

Միջոցառման ավարտին Տ. Բագրատ եպիսկոպոս Գալստանյանը զրուցեց աշակերտների հետ, պատասխանեց հետաքրքրող հարցերի, խորհուրդներ տվեց: 

Բանակի օր

Այն փաստը, որ դպրոցում դասերը դադարեցված են, չխանգարեց դպրոցի ավագ  դասարանների աշակերտներին  կազմակերպված ձևով  հունվարի 28-ին՝ հայոց բանակի ստեղծման օրը,  ներկայանալ դպրոց՝ հանդիսավոր տողանի :  Առավոտյան ժամը 10-ին աշակերտները արդեն շարված էին: Դպրոցի զինղեկ Ռ. Քամալյանը զեկուցեց տնօրեն Ա. Փաշինյանին աշակերտների պատրաստվածության մասին, որից հետո հանդես եկավ հայկական զինված ուժերի մասին զեկուցումով:

Այնուհետև ելույթ ունեցավ իններորդ դասարանի աշակերտուհի Շուշաննա Վանեսյանը: 

Նախապես որոշվել էր, որ դպրոցի  Պատանի երկրապահ ակումբի սերժանտական

դասընթացներն անցած աշակերտները այդ օրը կստանան իրենց վկայականները: Դպրոցի տնօրեն Ա. Փաշինյանը հանդիսավոր կերպով հանձնեց սերժանտական կոչման վկայականները:

Վերջում հնչեցին հայրենասիրական երգեր, որոնց հնչյուններն անտարբեր չթողեցին աշակերտներին: 

Գալդ բարի՛, Նո՛ր Տարի

Նոր տարվան նվիրված միջոցառումները դպրոցում միշտ էլ բազմատեսակ ու հետաքրքիր են լինում: Այս տարի ևս կազմակերպվեցին տարբեր միջոցառումներ՝ դասարանական, համադպրոցական: Համարյա բոլոր դասարաններոմ անցկացվեցին ցերեկույթներ, ուրախ հանդեսներ: Դպրոցի օտար լեզվի մասնախումբը այս տարի ևս յուրահատուկ ձևով շնորհավորեց ուսուցիչների նոր տարին. երեխաները ուսուցչանոցում կազմակերպեցին փոքրիկ գրական-երաժշտական կոմպոզիցիա:

Դպրոցի աշակերտական խորհուրդն էլ իններորդ դասարանցիների համար կազմակերպել էր դիմակահանդես, որն անցավ ուրախ և անկաշկանդ մթնոլորտում: Կազմակերպվեցին հետաքրքիր խաղեր, մրցույթներ, կատարվեցին պարային և երաժշտական գեղեցիկ համարներ: 

Թող 2016 թվականը բարի  ու խաղաղ լինի մեր ժողովրդի, մեր ուսուցիչների և աշակերտների համար:

Տիեզերք

Տիեզերքի մասին գիտելիքները մարդուն հուզել են դեռ վաղնջական ժամանակներից: Մարդուն միշտ էլ հետաքրքրել է, թե ինչեր են թաքնված տիեզերքի անհունում, ինչպես են առաջացել մոլորակները, տիեզերական մարմինները: Ֆիզիկայի երիտասարդ ուսուցչուհի Սյուզաննա Պետրոսյանի նախաձեռնած միջոցառումը հենց այս հարցերի պատասխանները պիտի տար հանդիսատեսին: 

Միջոցառումը թատերականացված դաս էր, որի ընթացքում Գարիկ անունով տղային, ով շատ էր դժվարանում սովորել տիեզերքի մասին դասը, տատիկը, պապիկը, ընկերները և ծնողները օգնում են հասկանալ և սիրել այն: Յուրաքանչյուրի բացատրած հատվածը էկրանի վրա արտացոլվում էր համապատասխան կադրերով: Ինչպես Գարիկը, այնպես էլ հանդիսատեսները բավականին գիտելիքներ ստացան այս գեղեցիկ դաս-միջոցառումից: Նրանք սովորեցին թե ինչպես և երբ են առաջացել մոլորակները, ինչ են համաստեղությունները, ինչ են իրենցից ներկայացնում աստղերը և ստացան բազմաթիվ այլ հարցերի պատասխաններ :

;

Ինտելեկտուալ խաղ

Դպրոցի հինգերորդ և վեցերորդ դասարանցիների միջև անցկացվելիք ինտելեկտուալ խաղին անհամբեր սպասում էին բոլորը: Խաղի կազմակերպիչը դպրոցի մաթեմատիկայի մասնախումբն էր: Նախապես կազմվել էին թիմերը, որոնց անդամները ընտրվել էին վիճակահանությամբ:  Յուրաքանչյուր թիմում կային ինչպես հինգերորդ, այնպես էլ վեցերորդ դասարանի աշակերտներ: Խաղի ընթացքում հնչող հարցերը արտացոլվում էին մեծ էկրանին:

Մասնակիցները, աչքերը չկտրելով հարցերից, աշխուժորեն քննարկում էին, ապա մեկը մյուսի ետևից պատասխանում հարցերին: Անաչառ ժյուրին գնահատում և մեկնաբանում էր պատասխանները: Խաղն ացավ ջերմ ու բարեկամական մթնոլորտում: Եվ այստեղ կարևորը ոչ թե հաղթանակն էր, այլ մաթեմատիկայից նոր, կարևոր գիտելիքների ձեռքբերումը : Խաղի վերջում բոլորը փաստեցին, որ դա հաջողվեց թե՛ մասնակիցներին, թե՛ հանդիսատեսին: