Պայծառ ու արևոտ օրը կրկին դպրոց է կանչել ուսումնատենչ մանուկներին, ովքեր ամռան երկարատև հանգստից հետո նոր սպասելիքներով ու ակնկալիքներով եկել են հարազատ կրթօջախ: Բոլորը կարծես կարոտել են իրար և, թվում է, ժամանակը չի բավարարելու ողջ ամռան ընթացքում կուտակվածը միմյանց պատմելու համար:
Դպրոցի տնօրեն Ա. Փաշինյանը ողջույնի խոսք է հղում բոլոր ներկաներին, շնորհավորում՝ գիտելիքի օրվա առթիվ:
Իսկ օրվա հերոսները առաջին դասարանցիներն են, ովքեր խոստացան լավ սովորել և արդարացնել բոլորի հույսերը: Նրանք միասին հնչեցրին նոր ուսումնական տարվա առաջին զանգը, որի ղողանջների տակ աշակերտները մտան դպրոց:
Ֆրանսիական պարեր, ֆրանսիական երգեր, ֆրանսիական շարժուձևեր, ֆրանսիական կոլորիտ... Մի խոսքով, կարծես թե դահլիճի բեմում, ասես կախարդանքով հայտնվել է ֆրանսիական մի գողտրիկ բուլվար: Այստեղ հանգիստ զբոսնում են նրբագեղ ֆրանսուհիները՝ իրենց կավալերների հետ միասին, մի կողմում փոքրիկ սրճարանն է, մյուս կողմում ՝ նկարիչ-վարպետն է վրձնի հարվածներով գեղեցիկ տեսարան ստեղծում...
Ֆրանսերենի երիտասարդ ուսուցչուհի Հայարփի Ցուցուլյանի յուրահատուկ մտահղացումն է՝ նվիրված ֆրանկոֆոնիայի օրվան: Աշակերտները անկաշկանդ խոսում ու երգում են ֆրանսերենով, բեմադրում մի գեղեցիկ հեքիաթ, և այս ամենը հմտորեն կազմակերպված ռեժիսոր-ուսուցչուհու կողմից: Վերջում հանդիսատեսները հիացան ուսուցչուհու և աշակերտների երգով, որն ավելի մեծ հետաքրքրություն հաղորդեց միջոցառմանը:
Հայրենասիրությունը, Հայրենիքի նկատմամբ պարտքի զգացումը այն կարևոր արժեքներից մեկն է, որ սերմանվում է մեր դպրոցի յուրաքանչյուր աշակերտի հոգում: Այդ կարևոր գործում մեծ նշանակություն ունեն միջոցառումները: Այդպիսի մի ուսանելի միջոցառման հեղինակ դարձավ երրորդ դասարանի դասվար Մարգարիտա Մկրտումյանը, ով իր դասարանի աշակերտների հետ հայրենասիրության իսկական դաս մատուցեց կրտսեր դասարանցիներին:
Ջինիշյան հիմնադրամի հովանավորթյամբ ՀՀ մարզերի հանրակրթական դպրոցներում կազմակերպվել և գործում են բանավեճի ակումբներ: Ակումբի նպատակն է աշակերտների մոտ զարգացնել բանավիճելու կուլտուրան, պատրաստել իրազեկ քաղաքացիներ: 
